Ál, stál, mál, kál, tál og nál !

Ég held í alvörunni að Íslendingar séu að fara á límingunum þegar að kemur að ál-málum! Þegar að ég horfði á fréttirnar í gær voru kosningarnar í Hafnarfirðinum auðvitað aðalmálið, en í framhaldi af þeim var talað um að reisa álverið bara í Helguvík í staðinn. Svo var sýnt frá opnun álversins í Reyðarfirði og ef að einhver skyldi halda að það væri ekki nóg af fréttum um álversmál þá eru hugmyndir uppi um að reisa álver, sem að vinnur vörur úr álinu, í Þorlákshöfn.

Og þó að það hafi ekki verið akkúrat í þessum fréttatíma, má ekki gleyma álverinu sem að Húsvíkingar eru svo æstir í að fá. Ég held að það sé orðið alveg ljóst að Íslendingar eru alveg álkolkexruglaðir, það sér hver heilvita maður að svo einhæfur þungaiðnaður getur ekki verið lausnin fyrir aldur og ævi. Það er margt til í þeim rökum að það sé betra að nota umhverfisvæna orku íslendinga í stað þess að bræða þetta í útlöndum og ég skil að eitthvað verði að gera í atvinnumálum úti á landi - en álver getur ekki verið lausnin á öllum okkar vandamálum.

Sem betur fer eru fleiri og fleiri Íslendingar að skilja að ál er ekki málið, og reyna að koma skoðun sinni á framfæri og beita ráðamenn þrýstingi, t.d. með því að skrifa undir á Framtíðarlandinu. Ég skora á lesendur mína að gera hið sama, hafi þeir ekki þegar skrifað undir!

Ég held að ef ál-látunum fer ekki að linna, munum við grínlaust þurfa að breyta þjóðsöngnum og syngja hann að hætti Spaugstofumanna í framtíðinni...

Athugasemdir

[Sigurborg Ósk (IP-tala skráð) 6.4.2007 kl. 12:06]

Hei siss! Skemmtileg bloggsíða hjá þér. Var reyndar að skoða khí síðuna þína og verð að leggja inn athugasemd hjá vefstjóra. Allir í fjölskyldunni eru með fallega mynd af sér og fyndna mynd, en ég er bara með fyndna mynd ( sem er semsagt ekki falleg) og mynd af Tisu! Ósanngirni, þú hlýtur að eiga einhverja skárri mynd af mér, þar sem ég er ekki nývöknuð og Coco Pops minn besti vinur....
Annars er allt flott að frétta af Hvanneyrinni, var jafnvel að spá í að sækja um vinnu hjá Lögreglunni í Borgarnesi í sumar, það væri helvíti flott....!

Annars er ég alveg hjartanlega sammála þér með álið, Draumalandið hans Andra útskýrir þetta ansi vel. Svo er ég að sjálfsögðu búin að skrifa undir hjá framtíðarlandinu, Áfram Ómar!!!

Bestustu kveðjur frá Litlu Systur